45 Haec loquutus Iesus, venit Hierosolymam, et ingressus est Templum, unde eiecit vendentes et ementes, dicens:

46 In Scripturis dicit Deus: Domus haec mea non negotiationi dicata est, sed precationi: vos autem vertistis illam in speluncam latronum, spoliantes hospites, et insidiis impiis vestrum lucrum aliorum damno procurantes. Hoc facto Dominus Iesus declaravit, quantam eprniciem adferant Ecclesiae, qui sub praetextu pietatis student foedo quaestui, qui sub titulo religionis suum agunt negotium, non pascentes gregem, sed deglubentes, et insincera doctrina perimentes animas, quas sincera debebant vivificare.

47 His peractis DOminus, velut in suo regno versans, quotidie docebat in Templo, palam contemta Pharisaeorum insanabili malitia. His rebus irritati, qui inter Sacerdotes primas tenebant, Scribae ac primores populi captabant occasionem perdendi Servatorem.

48 Non deerat mala mens, sed non affulgebat spes perficiendi quod volebant. Audierant acclamationes populi, videbant et in Templo totam multitudinem suspensam pendere ab ore illius: tanta erat divini sermonis et vis et gratia. Fastidiebatur istorum frigida doctrina, veluti vappa, de lotionibus, de corbona, de decimanda menta et ruta, semel gustato musto vigoris Evangelici. Hinc metuebant auctoritati suae, metuebant quaestui suo, metuebant regno suo. Quod autem id temporis iuxta historiam accidit, id frequenter evenit iuxta tropologiam, quoties hi, qui religionis arcem tenent, quique sacrae doctirnae professione conspicui sunt, conspirant cum profanis Principibus adversus Iesum, tum imminet ingens exitium populo. Id fit, quoties auctoritas Sacerdotum, ac sacrae doctinrae professorum, adulatur huius mundi Monarchis, et illorum affectibus subserviunt auctoritate sua, quorum potentiam oportebat salubribus ac liberis monitis cohibere: ac vicissim Monarchae suis opibus, Episcoporum ac Theologorum pravas cupiditates, hoc est, avaritiam, ambitionem, tyrannidem fulciunt ac muniunt: quanquam neturi alteros amant, tamen impia collusione in perniciem Evangelicae veritatis tradunt operas mutuas. Horum scelerata coniuratio maius exitium adfert orbi, quam tum adferebat Pontificum, Scribarum, Pharisaeorum ac primorum conspiratio.