49 Sitio salutem hominum, et huius gratia veni in mundum, ac meo desiderio iam omnis mora longa est. Non est diluta, nec humana doctrina, quam e coelis attuli. Merus ignis est, aut purgaturus hominem, aut usturus. Et ideo veni, ut hic ignis accendatur in terris. Quid enim aliud desidero? Semel accensus, late corrpiet universum mundum incendio.

50 Sed non exsiliet hic ignis, nisi percussus fuerit in cruce hic silex corporis mei. Superest adhuc ille baptismus, quem mihi praescripsit Pater, ut tingar proprio sanguine, ut mea morte poenas luam pro peccatis totius mundi. Tum demum emicabit inter homines illa scintilla caritatis Evangelicae, quum viderint innoxium ultro pro noxii sustinuisse mortem ignominiosam. Haec enim est scintilla perfectae caritatis. Et ab hoc baptismo non solum non abhorreo, sed amore salutis humanae vehementer angor, ut quam primum perficiatur. Abhorret natura corporis, sed desiderat animi caritas.

51 Verum hic ignis accensus, excitabit magnos in mundo tumultus. Vehemens enim erit ignis et coelestis, discutiens et excutiens omnes affectus humanos. An creditis quod venerim allaturus pacem in terras, quam mundus hic amat, cui tum tranquillitas est, quum satis factum est animi cupiditatibus, quum mali cum malis consentiunt? Non profecto, non veni conglutinaturus tales concordias, sed immissurus dissidia.

52 Non omnes obedient Evangelio, et Evangelii causa contemnenda sunt omnia. Itaque fiet ut in eadem domo, in qua prius erat mala pax, nascatur salutare dissidium. Siquidem quinque natura coniunctissimi, mea causa dividentur inter sese, tres adversus duos, ac rursus duo adversus tres.

53 Quid enim coniunctius, quam patri filius? Et tamen pater Evangelii causa simultatem exercebit cum filio. Et filius Evangelii gratia patrem contemnet. Similiter mater dissidium habebit cum filia, sed apud filiam plus valebit caritas Evangelica, quam affectus parentum. Socrus item bellum suscipiet cum nuru sua, sed apud alteram praeponderabit amor salutis aeternae, affinitati carnis. Vehementius enim urgent vincula spiritus, quam naturae.