Daily Gospel Meditation (8/31/23) Erasmi Paraphrasis in Evang. Matthaei 24:42-51

Erasmus' Paraphrase of the Gospel According to Matthew

Chapter 24 Verses 42-46

42 Proinde quandoquidem haec absque dubio sunt eventura, nec potest sciri vertum quo die ventura sint, semper vigilate, ne vos ille dies opprimat imparatos. 43 Si vigilant homines ne pereat pecunia, quanto magis vobis vigilandum est ne pereat anima. Quis est enim paterfamilias tam supinus, qui si sciat furem nocturnum irrepturum in aedes suas, sterteret totam noctem ac pateretur domum suam perfodi. 44 Vobis igitur est omni vita vigilandum, quia certi estis praeter exspectationem venturum diem illum. Sic enim vivendum est, ut quandocunque venerit ille dies, reperiat vos in officio, ut statim ad praemum possitis assumi. 45 An non idem facturus sit servus prudens ac fidelis, quam Dominus peregre profecturus, praefecit suae familiae, ut caeteris familiaribus praeberet cibum suo tempore? Non illi praescribit Dominus, quando sit domum rediturus, ne possit in officio cessare: 46 sed quandocunque redierit Dominus, nonne beatus serit ille servus, si offenderit eum fungentem officio suo?

Verses 47-51

47 Pro certo dico vobis, quod expertus illius fidem, audebit illi maiora credere, praeficietque omnibus bonis suis. 48 Contra, si malus servus et infidelis dixerit in corde suo: Diutius abest Dominus, et fortasse nunquam est rediturus: 49 atque hac spe coeperit percutere conservos suos, et neglecta familia, bibat et edat cum temulentis, 50 quam is est futurus infelix, cum Dominus venerit, die quo non exspectabat, et hora qua non suspicabatur eum rediturum. 51 Non enim solum submovebitur ab officio suo, verum etiam Dominus dissecabit eum medium, et portionem illius adiunget hypocritis, qui titulum habent Evangelicae functionis, cum factis ipsis pugnent cum Evangelio. Illic pro male dulcibus voluptatibus, quibus ebrius non observarat adventum Domini, intolerabili cruciatu punietur, risu verso in fletum, et cantilenis in stridorem dentium

Daily Gospel Meditation (8/31/23) Erasmi Paraphrasis in Evang. Matthaei 24:42-51

Table of Contents

Erasmus' Paraphrase of the Gospel According to Matthew

Chapter 24

Verses 42-46

Verses 47-51

Introducing a New Edition of Erasmus's

Paraphrasis in Evangelium Marci